أحد قيادات الأمن لـ(بوابة الشروق): أحداث إمبابة مخططة وهناك عمليات تحريض لإثارة الفتنة الطائفية

صرح أحد لواءات الشرطة لبوابة الشروق بأن ما يحدث في إمبابة الآن هو عملية مخططة ومدروسة والغرض منها إثارة الفتنة الطائفية والتحريض على العنف.

وعلى صعيد متصل نجحت قوات الجيش والشرطة في فض الاشتباك المسلح بين مسلمين ومسيحيين حول كنيسة مارمينا بإمبابة، بعد أن اقتحمت الشارع الذي تتواجد فيه الكنيسة، حيث توقف إطلاق النار وتم السيطرة على الحريق في مبنى مجاور للكنيسة.

على صعيد آخر، سمع دوي إطلاق نار كثيف في محبط كنيسة أخرى في شارع الوحدة بإمبابة أيضا، وهو ما دفع مدرعتين تابعتين للقوات المسلحة التوجه إلى هناك للتعامل مع هذه الاشتباكات، فيما صرح اللواء فارق لاشين مدير أمن الجيزة لـ"بوابة الشروق"، أنه جاري التنسيق بين الشرطة والجيش للسيطرة على الاشتباكات وإعادة الهدوء للمنطقة.

على فكرة الموضوع فعلا مخطط
دول مجموعة بلطجية مسلحة ماشية تضرب فى الكنائس وتسير الفتن
لان اللى فى سجن طره للأسف بيعملوا اتصالاتهم وشغالين فل الفل

الحكايه بقا اصلها ايه......... شاهد عيان يروى وقائع الاحداث



اصلا البصراوي دى كمنطقه جوا امبابه الشرطه والمباحث بيخافو يدخلو هناك عشان فبها صعايده -احدع ناس طبعا - وتجار مخدرات ومسجلين خطر بالعبيط دا هما عادي كده وقبل كده فى ظابط شرطه وخمس عساكر حبوا يقبضوا على واحد جوا من عيله كبيره الظابط والعساكر خرجوا جثث دا بس عشان تعرفوا طبيعه المكان





واحده اصلا قبطيه اسلمت من فتره واتجوزت واحد مسلم ودا نقلا عن الناس هناك بلسانهم قالو انها اتصلت بواحد من سلفيين المنطقه بعد صلاه المغرب بربع ساعه وقالتلو ان اهلها خطفوها ورجعوها الكنيسه وقعدت تصوتلو فى التليفون الراجل طبعا خدته الشهامه ولم الناس وطلعو على الكنيسه واول ما وصلو ضرب نار اتفتح عليهم من فوق الكنيسه والعماره اللي قدامها وفى ناس جريت على الكنيسه وقالت الحقو السلفيين جاييين يهدو الكنيسه قاموا قافلين الكنيسه من جوا واتقطع النور عن المنطقه



وفى الزحمه الناس قعدت تلطش فى بعض



والجيش وصل







انا وصلى الخبر من تويتر وقت صلاه العشاء نزلت اصلى وطلعت على هناك وصلت تقريبا على 8:30 كان فى ناس متجمعه قدام الكنيسه من اهل المنطقه و3 مدرعات من الجيش وضرب نار كتير متواصل بين الجيش وناس مسلحين فوق الكنيسه وفوق بيت قدامها والكنيسه اصلا فى شارع صغير جانبى والجيش ماكانش عرف يتدخل من كتر الرصاص اللى كان جاي من فوق العماره دى والكنيسه وكانو معاهم مولوتوف حدفوه على كوم زباله كبيير قوى قدام الكنيسه فالنار ولعت فيه كله



شوفت بعينى 2 مصابين وكان هناك 3 عربيات اسعاف خدو مصابين ومشيوا



بعد كده فى قناصه من الداخليه جم كانو لابسين مدنى وخدوا اتنين من شباب المنطقه طلعوهم على سطوح اعلى من العماره ولما طلعوا ضرب النار بقى متواصل بغزاره من الجيش واستعملو رشاشات الالى بتاعت المدرعه وبعد كده فى فرقه حاولت تقتحم الكنيسه والمطافى جت وبدأت تطفى النار المولعه اللى قدامها وفضلنا نسمع صريخ من جوا الكنيسه لمده 10 دقايق والضرب بره بردو كان شغال على فترات وهديت الدنيا خالص بعد كده ورجع نور الكنيسه ينور ودخلت 3 مدرعات الشارع الصغير بتاعها واول ما دخلو المسلحين اللى كان على العماره بدأؤ يحدفو مولوتوف على المدرعات فبأو يرجعو تانى



اهل المنطقه لما لقو المدرعات بترجع اتجمعوا وبدأو يهتفوا "مسلم ومسيحى ايد واحده " وجرى قدامى واحد سلفى بدقن معاه سكان اقباط من البيت اللى قدام العماره اللى فيها المسلحين وكسروا الباب وخدوا معاهم عساكر شرطه عسكريه وطلعو فوق السطوح وشويه عيال عفاريت من المنطقه عملو مولوتوف فى ثوانى وطلعو وراهم وفضلو يحدفو على المسلحين اللى فوق العماره والناس اللى فى الشارع جابو موتوسيكلات وسلطو النور بتاع الكشافات على العماره دى فالمسلحين مابقوش عارفين يضربوا نار خالص والمولوتوف فضل نازل عليهم لحد ما الجيش اقتحم العماره دى نفسها والقناصه والجيش انتشرو على كل بيت حوالين العماره دي وبعد كده الدنيا هديت تماما والامن المركزي اللى كان وصل على 9:30 كده بدأ يعمل كردون حوالين المكان



والناس فضلت تهلل للجيش والكلام دا على الساعه 10:30



بعد كده انا مشيت والناس بدأت تروح بس الاغلبيه لسه واقفه



اللى انا مستغربله كميه الرصاص اللى اتدربت من المسلحين دول



وباب العماره اللى كانو قافلينو وحطين وراه متاريس كأنهم كانو مستنين حاجه تحصل



والناس مش عارفه اصلا هما مين



أقباط ومسلمين سلف وغيرهم كانو وقفين جنبى كله بيقول مين دول



واشمعنا البنت دى تتصل بعد المغرب بربع ساعه الوقت اللى معظم السلفيين بيقضوه فى المسجد دروس ووعظ وكده



مش عارف انا هاروح تاني الصبح عشان اعرف الدنيا وصلت لحد فين



بس المهم ان اهل المنطقه اقباط ومسلمين كانو جنبى كتف فى كتف وهتفوا



لا اله الا الله



مسلم ومسيحي ايد واحده



وطز فيكو يا بتوع الطائفيه مش هتعرفوا تولوعو بينا



شاهد عيان : محمود حافظ

بجد كلامك رائع

ميرسى لمروركم وفعلا يا احمد عندك حق وميرسى للمعلومات دى يا قمر

شكراااا ليك انت ياهيما
و ياللا انت اللى قمر انا مش قمر

لا باة انتى اللى قمر انا مش قمر